O Museo do Humor de Fene acollerá entre os meses de decembro e xaneiro a exposición “Francisco Ibáñez, el Mago del Humor”. Composta por 130 revistas, desde os anos 50 ata a actualidade, 20 debuxos orixinais e 250 elementos expositivos de diferentes tamaños, a mostra propón un percorrido pola obra do historietista Francisco Ibáñez, creador, debuxante e guionista dos personaxes máis célebres do tebeo español desde os anos 50 ata a actualidade. A inauguración da mesma terá lugar o vindeiro 27 de novembro.
Desde a Concellería de Cultura e Ensino do Concello de Fene convídase aos colexios e sociedades do municipio a concertar visitas guiadas á devandita exposición.
As reservas para os grupos de escolares do concello efectuarase antes do 31 deste mes, enviando un correo electrónico a museodohumor@gmail.com.
A partir desa data, poderán solicitar visitasn guiadas os centros de ensino e entidades de calquera localidade da comarca. O transporte para o desprazamento dos estudantes correrá a cargo dos propios centros.
A idade recomentada para a visita é de 8 a 16 anos, aínda que os máis pequenos poderán gozar tamén da mesma ao resultar moi atractiva visualmente. “A mostra pretende dar a coñecer ao visitante todos os matices que compoñen o icono que é hoxe Francisco Ibáñez no mundo do cómic no noso país”, informan desde o museo.