O curro da Capelada reuniu máis de 200 bestas na tradicional Rapa

Os amantes dos cabalos tiveron onte unha cita ineludible na serra da Capelada. A Rapa das Bestas, unha tradición que desde hai dous anos encárgase de organizar a Asociación San Andrés Eventos coa colaboración do Concello de Cedeira, reuniu onte a máis de 200 animais que viven en liberdade e que nesta festa se xuntan no curro para lles cortar a crina do pescozo e do rabo.

A xornada de onte foi, porén, “a fin de festa” dunha intensa semana de traballo para os membros da organización –que contaron coa colaboración de amigos e doutros cabaleiros– para ir preparando a baixada dos cabalos ata a zona de celebración da festa. Algúns, tal e como explicaba onte o presidente da entidade organizadora, Jorge Bellón, están preto, mais noutros casos atópanse a uns kilómetros de distancia.
Tralo traballo desenvolvido o sábado para desparasitar aos animais, onte foi a quenda, logo de reunir a todos os animais no curro, para a “rapa” en sí mesma, coa que se pretende que queden máis saneados e frescos de cara a chegada do verán. Tamén se fai a marcaxe daqueles que o precisan así como o tradicional mercado de gando que tamén forma parte do ritual da festa.

Probas
Moitos dos asistentes puideron xantar xa preto do curro na carpa situada para a ocasión na que se serviu churrasco e carne ao caldeiro. Puideron así repoñer forzar para afrontar a xornada vespertina, que deu comezo sobre as 16.30 horas co inicio das carreiras libres, nas que houbo competicións de galope e andadura cerrada e chapeada.

A organización repartiu arredor de 1.800 euros en premios entre os gañadores, así como sacos de penso.
A Asociación San Andrés Eventos, que o pasado ano tomou as rendas da organización, quere revitalizar unha cita de especial significado para a comarca do Ortegal e coa que tamén colabora a Deputación da Coruña e o distrito forestal da zona.

Ademais, tal e como hais uns días salientaba o alcalde en funcións da vila, Pablo Moreda, “forma parte do noso legado cultural e patrimonial e xoga un papel moi importante no saneamento do gando”.