10º-14º
jueves | 25 abril | 2024
O presidente da Deputación de Lugo e secretario xeral do PSdeG en Lugo, José Ramón Gómez Besteiro, entregou esta tarde na sede do seu partido un total de 5.400 sinaturas que avalan a súa candidatura á secretaría xeral dos socialistas galegos.
O dirixente socialista entregou esta tarde, na que conclúe o período para a entrega de apoios co fin de poder concorrer ás primarias do PSdeG, estes avais á súa candidatura, case a metade da militancia con dereito a voto, un total de 11.250 persoas.
Esta mesma tarde ten previsto entregar os seus avais o outro candidato que tratará de aspirar á secretaría xeral do PSdeG, o alcalde da Illa de Arousa, Manel Vázquez.
Nunhas declaracións aos xornalistas tras entregar os apoios cos que conta na sede dos socialistas galegos, en Santiago, Besteiro mostrou a súa "enorme satisfacción" por obter 5.400 avais de compañeiros, e lembrou que fai oito meses adquiriu o compromiso de optar a dirixir os socialistas galegos.
Durante este tempo, dixo, percorreu toda Galicia e hoxe séntese con "máis ilusión que coa que empecei, sobre todo, reforzado por ter esa confianza" dos compañeiros que o avalaron para que sexa candidato á secretaría xeral, que ocupa agora Pachi Vázquez, e que este mes de xullo anunciou que non se presentaría para revalidar o cargo.
Gómez Besteiro destacou a súa "absoluta determinación" para liderar o partido, "convencido do proxecto e, sobre todo, coa ansia de sumar e darlle unidade ao PSdeG, que creo que é o que desexan a maior parte dos militantes".
O candidato dixo estar tamén contento "polo candidato Manel", o outro precandidato que obtivo os avais suficientes para participar na consulta que os socialistas galegos levarán a cabo o 7 de setembro para elixir o seu novo líder.
Tamén declarou estar "moi contento pola saúde democrática" do Partido Socialista, xa que a participación no proceso "pode superar" o do corpo electoral galego nas últimas eleccións autonómicas, máis do 66 por cento, afirmou. EFE
