A comarca mostra a súa música, comida e arte no encontro dos concellos do Camiño Inglés en Betanzos

“Trátase da primeira vez que se xuntan os 18 concellos do Camiño Inglés”, anunciaba onte na praza dos Irmáns García Naveira o presidente da Deputación da Coruña, Valentín González Formoso, ao inicio da celebración da feira “Primavera no Camiño Inglés”.
Os sete concellos das comarca de Ferrol e Eume polos que discorre o percorrido estiveron representados por autoridades políticas –como a concelleira de Patrimonio Histórico do Concello de Ferrol, Rosa Méndez, ou o alcalde de Pontedeume, Bernardo Fernández–, ademáis de ofrecer distintas degustacións e demostracións dos productos e artes propias dos municipios.
Así, a carpa instalada polo organismo provincial para a ocasión, ofreceu catas da empanada e pan de Neda, da cervexa La Ferrolana, das patacas fritas Casa Vella de Fene, e máis da proia de Pontedeume.
Como é habitual en calquera celebración, a música tamén xogou un papel fundamental no evento. Por isto, a banda tradicional Airiños de Fene e cantareiras, as rondallas Lucero del Alba de Neda e Chicas de Oro de Pontedeume e o grupo de gaitas e de baile tradicional Airiños do Frade de Cabanas, foron invitados para amenizar a xornada. 
O Concello de Narón proxectou videos onde se podían ver os lugares e edificios máis emblemáticos da cidade e elementos que forman parte do seu patrimonio e as fiandeiras de Cabanas Rural realizaron unha exhibición da súa arte durante case todo o día.
“Esta reunión pon de manifesto o esforzo conxunto que estamos a desenvolver para impulsar o Camiño Inglés, construído polas pisadas dos camiñantes durante séculos, que contrubuiron a forxar a identidade única dos nosos concellos e a desenvolver un tipo de turismo sostible que axuda a dinamizar as economías locais e a pór en valor lugares únicos coma as Fragas do Eume, o río Mandeo ou as Mariñas betanceiras”, explicou González. l