Opresores?

Quen teña visto También el agua (2010), o, para min excelente, filme de Iciar Bollaín, seguro que ten en mente aquelas escenas nas que Raul Arévalo pronuncia o coñecido Sermón de Advento, do domingo 21 de decembro de 1511, que supuxo a primeira denuncia do inhumano trato que se lles aplicaba aos nativos da Antillas. Alí, na igrexa dos dominicos da Española (Santo Domingo), tal como a Historia nos conta e a película recolle, estaba presente frei Bartolomé de las Casas, quen, xa estaba na illa como doutrineiro, aínda que se seguía ocupando das súas lucrativas encomendas. Algúns anos despois, o frade dominico, que sería bispo de Chiapas, ocupouse da defensa dos indíxenas e, por volta de 1539, estando xa en México, comezou a redactar a súa Brevissima relacion de la destruycion de las Indias (Sevilla 1552), que se abre cun prólogo dirixido ao “muy alto y muy poderoso señor el príncipe de las Españas don Felipe, nuestro señor”, quen catro anos despois se convertería en Felipe II. Só desde un profundo descoñecemento da historia se pode dicir, como fixo Pablo Casado, que o que se difundiu que dixera o presidente mexicano “Es de una ignorancia escandalosa y una auténtica afrenta contra España y contra su historia” ou que se trata dunha “ofensa intolerable al pueblo español”, que manifestou Albert Rivera. E xa case sería mellor nin ter en consideración o manifestado por Santiago Abascal: “López Obrador, México y toda América deberían agradecer a los españoles que llevaran la civilización y pusieran fin al reinado del terror y la barbarie al que estaban sometidos”. Porque dicir iso supón acreditar no exquisito comportamento de Colón e os posteriores “descubridores” cos habitantes das terras “descubertas”. Eduardo Galeano recolle no seu  Ser como ellos y otros artículos (1992) que Ignacio Ellacuría, o asasinado xesuíta vasco-salvadoreño, lle dixera que lle “resultaba absurdo eso del Descubrimiento de América. El opresor es incapaz de descubrir, me dijo:  —Es el oprimido el que descubre al opresor. Él creía que el opresor ni siquiera puede descubrirse a sí mismo”. Velaí a cuestión. Porque moi certo, e sensato, é o que escribiu o portavoz do PNV no Congreso Aitor Esteban: “No pasaría nada por reconocer que en la conquista de México se hizo mucho daño pero, desgraciadamente, en España siempre se pinta todo de color de rosa, se tiende a justificar y convertir todo en algo glorioso”.