Como teño previsto pasar uns días fóra da casa escribo estas liñas pouco despois de que se fixese público o documento Coalición progresista. Un nuevo acuerdo para España, que, naturalmente, lin coa debida atención, mais, aquí e agora, non vou facer comentario ningún sobre o mesmo. Tempo haberá. Do que si quero deixar constancia é dun par de cousas. A primeira que, como xa dixen máis dunha vez no noso Diario, tería preferido un goberno do PSOE respaldado por un acordo programático, que podería ter sido este mesmo, e a segunda que, malia iso, me satisfaceu -agardo non ter que lamentalo- que, por fin, se teña chegado a asinar un acordo, feito nada doado no territorio no que nos movemos. Agora resta que as forzas políticas que subscriben o documento consigan os apoios necesarios para poder conformar o goberno que o poida botar a andar, aínda que sexa tendo que seguir escoitando tantas memeces como as que nos levan quentando os ouvidos desde que se coñeceron os resultados electorais. Ladran...
Deséxolles un bon ano.