Estou, estamos no mundo enteiro, a vivir tempos difíciles. Este cualificativo que saíu así, de xeito espontáneo, queda curto, non quero pecar de alarmista pero a verba xusta é tráxicos. O peor é que a esta gran traxedia non se lle ve o final
Non creo que a solución estea na política. Nin os de aquí nin os de acolá teñen o bálsamo de fierabrás que acabe coa pandemia. Por elo, penso que acae moi ben o título deste apunte. Nin dereitas nin esquerdas, o problema é de todos e todos temos a obriga de poñer o noso gran de area para solucionalo, non hai outra. Tampouco son estes tempos de mudanzas nin de experimentos que os políticos, xa se sabe o que buscan, todos.
Non valen, xa o teño dito aquí, as críticas valeiras de contido, sen que vaian acompañadas de solucións. Mentres non haxa outras mellores, non queda máis que aterse as directrices das autoridades sanitarias: Utilizar as máscaras, anque dubidemos da súa efectividade, lavar as mans a miúdo, manter as distancias...etc.
Antonte en Londres houbo unha manifestación contra as restricións do goberno onde se dixo que o Coronavirus é un bulo. Non é a primeira vez que se escoita semellante comentario, mesmo no noso país. A min que mo expliquen, ¿é que os máis de trinta millóns de contaxios e un millón de mortos tamén é un bulo?. ¿Estamos todos tolos ou que?
Leo no DF o artigo de Tello Ripa. Estou de acordo co que di dos chineses. Remata dicindo que a cousa pode desembocar nunha guerra de China contra os EEUU, sen falar das implicación correspondentes no resto do mundo. Aínda estamos a tempo de evitala, loitemos todos xuntos para elo que, xa temos dabondo co que estamos a vivir, bastante peor que unha conflagración mundial. Exixámoslle a estas dúas superpotencias sentidiño que, por moitas voltas que lle dean, a guerra non vai beneficiar a ninguén, nin tan sequera a eles.
Así que nin galgos nin podencos, nin farrapos de gaita como dicía miña nai. Aproveitemos, mellorando o que temos, todos cunha meta común que está ben clara: O mundo enteiro contra a pandemia, está en xogo a supervivencia da humanidade.
Pido perdón por estas opinións tan desacougantes pero estou convencido do que digo, non busquemos máis problemas, abonda cos que xa temos.
Os experimentos con gaseosa