Emoticonas

Hai tres días, cando unha dependenta dun coñecido centro comercial me pediu que lle puxese unha cariña, estiven a piques de facerlle un aceno. Teño que recoñecer que tardei uns segundos en decatarme do que quería: unha valoración da súa atención a través de ridículas emoticonas. Na seguinte tenda, o dependente indicoume que me ían chamar por teléfono para puntuar a súa atención e que no caso de non pórlle a máxima nota, tería problemas, pois un 8 ou un 9 non servía de nada no código establecido pola empresa. Perverso! En que momento me contrataran as compañías comerciais para facerlles o traballo suxo e de balde, pregúntome? O futuro laboral desas persoas estaba nas miñas mans e na do resto de clientes. Que ocorrererá se un se nega a realizar a valoración? Talvez o traballador sexa sancionado por non ser quen de convencernos. Vai ser preciso comezar a encher follas de reclamacións para acabar con esta práctica abusiva que nos converte, cando somos clientes, en capataces negreiros e, cando traballadores, en servos temerosos do látego da cariña.