Imprimir

Piñeiros acolle o encontro de rondallas e o “Memorial Lolete” de bandas de gaitas

Redacción Ferrol | 05 de julio de 2019

Os dous eventos da fin de semana foron presentados onte no Concello de Narón
Os dous eventos da fin de semana foron presentados onte no Concello de Narón

O Concello e a AVV do barrio naronés organizan as dúas citas que se desenvolverán mañá e o domingo

A música terá unha importancia capital esta fin de semana no barrio de Piñeiros coa celebración de dúas citas organizadas polo Concello de Narón e o devandito barrio e que terán lugar no campo da festa.

A primeira delas terá lugar mañá sábado, a partir das 18.30 horas, e consistirá nunha nova edición, a sétima, do Encontro de Rondallas Cidade de Narón.

O trío Blanco e Negro será o encargado de inaugurar o acto para, a continuación, dar comezo ás actuacións das rondallas. Nesta edición, o público asistente terá a oportunidade de gozar da música de Lucero del Alba, de Neda; Só Elas, de Ferrol; e Añoranzas, tamén da cidade ferrolá. A cita rematará cunha gran sardiñada, con racións de tres sardiñas, cachelos e pan a un prezo de cinco euros.

Domingo
O domingo será a quenda para a décimo quinta edición do Encontro de Bandas de Gaitas “Memorial Lolete”, que comezará ás 12.00 horas. Actuarán no evento as agrupacións Álvaro Cunqueiro, de Lago (Valdoviño); San Xulián, de Marín;  para pechar o acto Agarimo de Catabois, de Ferrol.

A primeira edición deste festival celebrouse no ano 2005 baixo a organización de Manuel García, “Lolete”, director por aquel entón da banda de gaitas de Agarimo, e Catabois, e José Francisco Pita, presidente da Asociación de Veciños de Piñeiros. Tralo falecemento de Lolete –que só puido asistir á primeira convocatoria–, Pita e Marcos García, fillo de Lolete, mantiveron, coa colaboración do Concello de Narón, unha convocatoria que desde entón leva o seu nome a modo de homenaxe.

A maiores, a AVV Piñeiros celebrará tamén o domingo a duodécima edición da Festa do Churrasco, As racións terán un prezo de 18 euros e incluirán paella, churrasco, chourizo criollo, liscos, patacas, pan, e bebidas, con bola con queixo fresco de postre e café. Comezarán a servirse ás 14.00 horas. Os tickets poden adquirirse no estanco e no local social de Piñeiros, nos establecementos Con Moita Miga (O Ponto), Carnizaría Suprema ou o mesmo domingo na carpa instalada no campo da festa. De amenizar a convocatoria encargarase o dúo Horizonte. O programa desta fin de semana foi presentado onte no Concello deNarón pola concelleira de Festas, Natalia Hermida; o presidente da AVV Piñeiros, Francisco José Pita; e José Luis Teijeiro e Santiago Vázquez, integrantes da citada entidade veciñal.

A edil naronesa, que animou ás veciñas e veciños a acudir a estes eventos, salientou a colaboración prestada pola AVV de Piñeiros “porque froito da mesma, dende o Concello, podemos facer nesta parroquia, ao igual que noutras da cidade, importantes eventos gastronómicos e con carácter festivo e cultural”. O presidente da AVV Piñeiros agradeceu a colaboración do Concello coa entidade.

Puede ver este artículo en la siguitente dirección /articulo/ferrol/pineiros-acolle-encontro-rondallas-memorial-lolete-bandas-gaitas/20190704221414260023.html


© 2019 Diario de Ferrol