9º-16º
miércoles | 24 abril | 2024
O roscón de Reis, un pan doce e adornado con froitas confeitadas típico destas datas, é un dos produtos de repostería máis difíciles de conseguir en casa, pola complexidade da masa. Quizais por iso se manteñan as colas diante das confitarías que mellor conseguen ese sabor e esa textura que tanto apetecen para poñer fin ao Nadal. En Ferrol, un dos puntos de maior afluencia é Gascón, na Estrada de Castela. Este establecemento é unha referencia para toda a comarca na mañá de Reis, e iso compróbase na afluencia continua desde primeira hora. Sinxelos ou con recheo, esta larpeirada despachouse sen cesar neste local e tamén noutros puntos estratéxicos de toda Ferrolterra. Aínda ao mediodía os máis deixados podían recoller os seus roscóns para chegar a xantar coa familia e, de paso, comprobar alí se os Reis non perderan o costume de deixar algún agasallo.
Pero os campións indiscutibles da xornada de onte foron os pequenos. Nas casas onde hai nenos a ilusión pola chegada de Melchor, Gaspar e Baltasar vívese con intensidade, a pesar de que xa en días previos tanto Papá Noel como o Apalpador van deixando petiscos. Os rapaces érguense máis cedo que de costume para comprobar se nos zapatos hai algún presente e se as súas maxestades e os camelos comeron e beberon os manxares deixados para animar o camiño. E despois do éxtase matutino, comezan a aparecer Reis insospeitados polas casas dos avós, tíos e padriños, nun festival de rachar papeis, abrir caixas, poñer pilas e montar xoguetes que é difícil de manexar.
Os xoguetes de sempre non perden espazo, aínda que se perfeccionan e incorporar avances. Ademais, a electrónica e a robótica ábrense camiño desde as idades máis temperás. Ao lado das tecnoloxías, convive a cultura manual: construcións, manualidades, imitación... Puzzles, xogos de mesa, contos, bicicletas, patíns e patinetes, obxectos deportivos, roupa e calzado completan unha lista de agasallos que se tenta adaptar a cada situación económica. Non hai que esquecer que proliferan nestas datas accións solidarias precisamente para garantir que todos os nenos poidan ter algún presente.
As boas condicións meteorolóxicas favoreceron a saída á rúa cos agasallos. Foi o peche dun Nadal que ofreceu sol despois da tormenta e facilitou a realización de todo tipo de actividades ao aire libre. Ferrol e Mugardos aínda viven hoxe unha xornada festiva. O resto da comarca empeza a voltar á normalidade e a instaurar as rutinas do 2020, dieta e ximnasio incluídas. Os nenos regresarán á escola mañá e a ollada ponse xa nas rebaixas e no Entroido.
