miércoles 21.08.2019

O Pazo da Cultura programa 25 espectáculos a partir de setembro

Os actores Carlos Blanco e Xosé Antonio Touriñán presentarán a súa última obra, “Unha noite na praia”
pazo de cultura de narón  actuación de Ses
pazo de cultura de narón actuación de Ses

Comedia, poesía, teatro, maxia, música, circo, ópera, danza ou góspel. Estas son algunhas das propostas que presenta o Pazo da Cultura de Narón para os vindeiros meses.


Seguindo a liña das programacións anteriores, a aposta dos responsables do espazo cultural para o outono caracterízase por unha oferta diversa que, nesta ocasión, reúne vinte e cinco espectáculos e que principia coa actuación dunha das parellas do momento, os humoristas Carlos Blanco e Xosé Antonio Touriñán, e remata, xa en decembro, con gospel.


Blanco e Touriñán actuarán tres días seguidos, o 13, 14 e 15 de setembro, mais non á mesma hora: o venres será ás 20.30 horas, o sábado ás 20.00 horas e o domingo ás sete da tarde.

Setembro
A súa comedia “Unha noite na praia” chega despois do éxito de “Somos criminais”, co que encheron non só no auditorio naronés senón en practicamente todos os lugares nos que o presentaron. Daquela, a súa aceptación provocara que mesmo tivesen que ampliar a súa xira.


Tamén en setembro chegará ao Pazo, en concreto ao café-teatro, o recital poético-musical “De abrentes e ocasos”, de Teatro do Atlántico. Será o día 20 ás 20.30 horas.
A compañía Farrés Brothers SL presentará o domingo 22 ás 18.00 horas “El silencio de Hamelin”, un espectáculo de teatro xestual e monicreques recomendado pola Rede Española de Teatros e Premio Fetén 2018 á mellor proposta de inclusión.
O setembro no Pazo remata o sábado 28, ás 20.00 horas, cunha obra de teatro clásico: “Viejo amigo Cicerón”. O actor José María Pou encarna o filósofo e orador romano nesta representación.

O mentalismo e a maxia serán os protagonistas na primeira cita de outubro, o día 5 ás oito da tarde. “Volver a creer, magia de la mente” é o título do espectáculo dun dos especialistas de referencia no panorama estatal, Toni Bright.
O venres, día 11, é a quenda de “O camiño”, unha presentación teatralizada de canto e música creada por Setestrelo e baseada no Camiño de Santiago.

Drexler e Valle-Inclán
Jorge Drexler ofrecerá o seu concerto “Silente” o sábado, día 12, nunha actuación que supón o regreso a un dos seus formatos máis celebrados, guitarra e voz, combinado desta volta con outro tipo de instrumentación para xerar paisaxes sonoras e visuais.


A comedia infantil –para cativas e cativos de 10 a 13 anos– da Compañía Pedras de cartón “Lázaro de Tormes”, os días 16 e 17, anticipará un dos principais reclamos da programación de outono, “Luces de Bohemia”, o sábado 19 ás 20.00 horas, dirixida e adaptada por Alfonso Zurro, da compañía Teatro Clásico de Sevilla.


O circo chega da man dos Hermanos Inconfundibles, que o 20 de outubro ás 18.00 horas presentan o espectáculo “La banda del otro-Yee-Haw”.


O teatro infantil –para nenos e nenas de 6 a 9 anos– de Elefante Elegante, o martes 22; a “Curva España” de Chévere e a comedia “Os fillos do sol”, de Contraproducións, completan a programación.


A partir do día 21 poderanse adquirir as entradas de todas as pezas na billeteira do Pazo ou na páxina web www.padroadodecultura.es.

Comentarios