11º-18º
viernes | 19 abril | 2024
O Concello de Narón volverá celebrar o Fin de Ano por todo o alto cunha festa que dará comezo á unha da madrugada na carpa instalada na Praza de Galicia. Un gran espectáculo de fogos de artificio marcará, na noite de mañá luns ao martes, o inicio dunha festa coa que se despedirá 2018 para recibir o novo ano.
A orquestra Cinema será a primeira en actuar nun dos dous escenarios que se ubicarán baixo a carpa. Amenizará a festa ata aproximadamente as 3.30 horas, dando paso a continuación ás actuacións de varios DJs.
Novidade
Unha das novidades do programa deste ano será un espectáculo Transformer, protagonizado por unha persoa caracterizada como un robot que realizará un total de catro pases e na que a música e os efectos de luces especiais cobrarán gran protagonismo.
A entrada á festa que se celebrará na Praza de Galicia é de balde. Así o recordou a concelleira responsable da área, Mar Gómez, que convidou ás veciñas e veciños de Narón a acudir a esta cita, que cada ano reúne a numeroso público na cidade.
Mercado de Nadal
As actividades organizadas no municipio naronés co gallo do Nadal continuarán hoxe co Mercado de Nadal, situado na Praza de Galicia, e que permanecerá aberto de 16.30 a 21.00 horas –continuará aberto ata o día 4–.
Ás sete casetas de postos de venda de comerciantes e artesáns únense os obradoiros (de 16.30 a 18.00 horas) así como un xardín de inverno efémero deseñado por un prestixioso paisaxista.
Tamén no marco desta proposta, hoxe, ás 18.00 horas, terá lugar o espectáculo infantil “Os contos de Pablísimo”. Todas as actividades son de balde.
