O parque fluvial de Freixeiro acolle desde hoxe unha feira de artesáns con traballos en directo

Un total de 16 postos de artesanía aséntanse desde hoxe ás 11.30 horas, e ata o próximo domingo, no parque fluvial de Freixeiro baixo a denominación de “Ruta de artesanía polas rías galegas”. Trátase de diversos profesionais chegados de toda Galicia e diferentes puntos de España (Cádiz, Barcelona, León, etc.) que integran este singular mercado. Nel os artesáns elaboran e ofrecen os seus produtos ao visitante. Desde xoias ata xabóns, pasando por pinturas ou pezas de roupa. Pinturas sobre discos de vinilo, camisetas pintadas a man, cerámicas ou sacos térmicos compoñen algúns dos produtos ofertados para todos os gustos.
A esta proposta súmanse tamén a mercadoría gastronómica, como queixos, embutidos, doces ou lambetadas, pero neste caso a súa calidade e orixe artesá vén acreditado pola Carta de Produto Artesá que acompaña o posto, dada a imposibilidade de elaboralo no mesmo lugar. Entre outras posibilidades ofrecidas están gominolas sen gluten aptas para persoas celíacas.
A Feira de Mestres Artesáns permanecerá aberta ata o vindeiro domingo, en horario de mañá (de 11.00 a 14.00 horas) e de tarde (desde as 19.00 horas en adiante).

regreso á comarca
Esta feira ten recalado xa na comarca, concretamente na vila de Cedeira, e regresará a Ferrolterra o próximo mes tralo seu paso por Narón. En concreto, poderá visitarse en Pontedeume do 8 ao 11 de agosto e na vila de Ares entre o 22 e o 25.