Narón enfía os preparativos da exaltación gastronómica do seu produto estrela, o pemento

Narón prepárase para acoller, entre o 16 e 17 deste mes, a celebración da exaltación do seu produto estrela, o pemento do Couto, a través da que será a décimo oitava edición desta festa gastronómica que ven de recoñer un froito da terra que xa se ten convertido nunha das principais referencias da cociña galega, mesmo comparable ó máis coñecido  pemento de Padrón. 
O evento, que foi presentado onte polas concelleiras de Festas e Turismo, Mar Gómez e Natalia Hermida, xunto co xerente da Cooperativa do Val, José Castro Leira, e o máximo responsable da Orde de Damas e Cabaleiros do Pemento do Couto, Tomás Casal, acompañados polo principal representante da AVV da devantida parroquia, contará cun amplo programa de actividades que inclué a concesión do “Pemento de Honra” ó veciño do lugar Ansemo Beceiro. “Despois de catorce anos á fronte da asociación e de moito traballo a prol desta festa e doutros eventos feitos sobre o pemento do Couto, consideramos que non podemos prescindir da súa experiencia e queremos integralo na Orde do Pemento do Couto”, dixo Casal.
Os actos propiamente ditos darán comezo ás 22.30 do primeiro día de celebración coas “Noites no mosteiro”, que inclúen concertos de música de Cámara no cenobio do Couto, que ademais verase iluminado para a ocasión.
O programa terá continuidade a partires das dez de mañá do domingo da vindeira semana coa apertura de postos con produtos ecolóxicos. Os visitantes poderán tamén percorrer o mosteiro coa axuda de guías. 
A xornada grande do evento contará tamén coa presenza da xornalista da TVG Raquel Fernández Montero, do programa “Aquí Galicia”, que será a responsable de pronunciar o pregón desta edición.
O xantar a base de churrasco e pementos do Couto dará comezo ás dúas da tarde. n