A alcaldesa naronesa, Marián Ferreiro, e o reposteiro local e propietario da pastelería Santy (Santa Icía), Santiago Otero, asinaron onte a cesión gratuíta e en exclusiva da receita orixinal proposta polo profesional para elaborar a Tarta de Narón. “O de hoxe é un acto moi especial para nós e quero agradecer en primeiro lugar a xenerosidade de Santi Otero e a súa familia por esta cesión, porque é un dobre orgullo que esta receita sexa dun obrador da nosa cidade”, indicou Ferreiro, ao tempo que incidiu na importancia desta elaboración a nivel gastronómico e como reclamo turístico. A previsión é que poda ser comercializada xa neste verán.

O executivo local iniciara este proceso para contar cun produto representativo da localidade no 2021, cando se rexistrou o distintivo na Oficina Española de Patentes e Marcas –cunha validez de dez anos–. En marzo deste ano o reposteiro presentou por Rexistro unha instancia ofrecendo unha cesión a modo gratuíto e en exclusiva dunha receita orixinal para preparar unha tarta que non se comercialice na actualidade e os seus dereitos de explotación a favor do Concello de Narón. Posteriormente nomeouse un comité de valoración para determinar se a elaboración cumpría os estándares establecidos. A empresaria gastronómica Lucía Freitas e o profesor técnico de Formación Profesional de Cociña e Pastelería Manuel Cordido emitiron unha valoración positiva da receita presentada por Santiago Otero.

Noces

“É gustosa, cunha textura agradable onde resalta o sabor das noces como ingrediente principal e de fácil réplica para os diferentes obradoiros interesados na súa elaboración e comercialmente viable no seu prezo final. Polas súas características de durabilidade e que non precisa refrixeración pode considerarse doce de viaxe”, indicou o comité, sostendo que a receita cumpre os obxectivos e confirma a idoneidade da proposta presentada por Santiago Otero para considerar a tarta como “representativa do Concello de Narón”.

Pola súa banda, o reposteiro recordou que non chegaron a tempo á convocatoria realizada no ano 2021 pero a súa muller –presente tamén xunto á súa filla na rúbrica de onte– continuou traballando na receita e “cando creímos que cumpría todos os requisitos propuxemos a cesión da receita ao Concello”. 

Resaltou, tamén, que o ingrediente principal é a noz e que pode ter “un amplo abano de comensais ao utilizar ingredientes sen glute nen lácteos”.