Máis de cincocentos escolares da bisbarra participaron no Correlingua

Máis de cincocentos escolares de sete centros educativos de Infantil, Primaria e Secundaria da comarca participaron onte nunha nova edición do Correlingua, que desta volta levaba por lema “Galego, a chave do mundo” e que, no caso de Ferrol, tivo lugar no Cantón de Molíns e no teatro Jofre.
Alumnos e alumnas dos colexios Centieiras e Os Casais de Fene, Recimil e Terra de Ferrol da cidade naval, Piñeiros e A Solaina de Narón e o IES de Cariño protagonizaron a carreira deste ano, na que, como as anteriores, predominou o seu carácter lúdico-educativo por riba do competitivo. Correlingua é a denominación que adoptaron de maneira común as diversas carreiras a prol do idioma galego en todo o país.
Esta actividade está organizada pola Asociación Socio-Pedagóxica Galega, a CIG-Ensino, A Mesa pola Normalización Lingüística, os Concellos de Lugo, Pontevedra, Ourense e Vigo, así como a Deputación de Lugo.
Logo das carreiras, os alumnos e alumnas que se implicaron nesta edición organizáronse en dúas quendas para asistir á festa final, conducida polo mago Martín Camiña e na que, ademais, se deu lectura ao manifesto gañador desta edición –a cargo de Antón Cortizas– e a unha actuación musical de Luis Prego. Namentres, o outro grupo puido participar nos xogos populares que tiveron lugar na explanada do Cantón.