Cinco alumnos do ciclo superior de Deseño e Edición de Publicacións Impresas e Multimedia do IES Leixa foron os elixidos para representar a campaña especial que leva a cabo a Asociación PuntoGal con motivo do Día do Libro, en colaboración coa Secretaría Xeral de Política Lingüística, a Federación de Librarías de Galicia e o propio centro educativo.
Así, desde o próximo luns e a- ta o 31 de agosto, distribuiránse 12.000 copias dos cinco marcapáxinas realizados polos estudantes do IES ferrolán en todas as feiras do libro de Galicia e en case duascentas librarías galegas. Cada un deles inclúe un código que rebaixa o prezo dun dominio .gal a 15 euros máis IVE.
O secretario xeral de Política Lingüistíca, Valentín García, sinalou onte no acto organizado no instituto que “unir o libro e os dominios .gal de internet é xuntar nun mesmo proxecto dous dos axentes máis importantes da cultura galega e en galego, un de tan longa tradición como prometedor futuro e outro que representa a innovación e a extensión da nosa lingua aos novos espazos de comunicación xurdidos nas últimas décadas”.
Pola súa parte, o director xeral de PuntoGal, Darío Janeiro, enmarcou esta iniciativa na aposta da entidade por “involucrarse de maneira decidida en actividades relacionadas coa lingua, a cultura e a tecnoloxía en Galicia, as tres almas do dominio”. Dese plan forman parte iniciativas como “o recente e moi exitoso consurso de relatos en colaboración coa Real Academia Galega ou a participación en Culturgal”, indicou, ao mesmo tempo que destacou a incorporación “dun proxecto no que xudamos a divulgar a creatividade dos estudantes dun centro público animando a practicar unha das mellores actividades que calquera de nós pode facer: ler un libro”.
Janeiro remarcou que o número de dominios rexistrados xa superou os 4.800 e fixo fincapé na oferta asociada ós marcapáxinas que “permite ter un dominio .gal a un prezo moi atractivo”.
Os traballos de Julio Santiso –“Navega por un mar de lectura e imaxinación”–, Aida Bao –“A lectura é á mente o que os exercicio ao corpo”–, Tamara Álvarez –“Para Viaxar lonxe non hai mellor nave que un libro”–, Natalia Romero – “Le e descubre novos mundos”– e Borja Rey –“Un millar de historias que quedan por descubrir”– foron os escollidos de entre un total de 25 presentados e poderán descargarse xunto co resto dos realizados polos estudantes na web de PuntoGal (asociacion.gal). l