Festival e foliada para celebrar os 30 anos da asociación Mestura

“É un orgullo levar xa tantos anos traballando desde Meirás polo noso folclore”. Así falaba onte a presidenta da asociación cultural Mestura, Mar Varela, verbo do 30 aniversario que cumpre a entidade e celebra mañá desde as 19.30 horas no local da AVV de Meirás. Unha cita na que se engade ao seu habitual festival de cantareiras esta especial celebración. O evento será completo. Así, comezará co festival en si no que actuará a formación leonesa Gritsanda; Os Carecos, de Ortegal; Donas e Galán, de Ferrol; Cantareiros do Rumial, da localidade de Muros e as cantareiras da propia entidade organizadora, Mestura. A continuación, a partir das 21.30 horas organízase unha foliada e un obradoiro de baile tradicional que contará coas intervencións de Vai Rañala, Meu, unha formación de Trasancos; No Cómbaro, das Pontes, e outra agrupación ferrolterrán, Lume nas Ferreñas. Todo aberto ao público.   

o pulo das raíces
A presidenta Mar Varela salienta: “Este ano aproveitamos a celebración por quinto ano do noso festival de cantateiras para levar a cabo un acto máis variado aproveitando o 30 aniversario”. 
Composta por cerca de 250 socios, Mestura está perfectamente integrada na parroquia de Valdoviño onde, segundo a presidenta, “incluso a xente máis nova vive este labor de forma entusiasta”. Cursos de guitarra, pandeireta ou cantareiras, entre outros, e un activo grupo de folc que actúa por toda Galicia forman parte do seu quefacer diario desde hai xa tres décadas.