martes 14.07.2020

Ferrol inicia o segundo control de Covid-19 a 2.600 persoas de 25 centros sociosanitarios

Os mesmos tres equipos comezarán esta fin de semana un cribado que durará entre dúas e tres semanas
A segunda ronda de probas por centros sociosanitarios desenvolverase nas próximas semanas | j.m.
A segunda ronda de probas por centros sociosanitarios desenvolverase nas próximas semanas | j.m.

O segundo control dos centros sociosanitarios na área ferrolá (que abrangue Ferrol, Eume e o Ortegal) comezará esta fin de semana e seguirá a mesma dinámica que o primeiro dos cribados, feito en pleno pico da pandemia, durante o mes de abril.

Tal e como explican desde o Sergas, a toma de mostras corresponderalles aos mesmos tres equipos, formado cada un deles por dúas persoas especializadas en enfermaría: unha diplomada universitaria e outra, técnica de coidados auxiliares. Está previsto que en dúas ou tres semanas, dada a dispersión da área xeográfica de influencia e o volume de persoas que hai que atender, poida estar completado o traballo. Previamente, e para facilitar a súa realización, os centros sociosanitarios aportan un listado actualizado de residentes e de traballadores para poder identificar todas as mostras.

En total, esta nova ronda de análises polos centros residenciais (incluíndo residencias de maiores e tamén de atención ás persoas con discapacidade, das que cada día proporciona información actualizada o Sergas) chegará a unhas 2.600 persoas, tendo en conta a profesionais e a residentes. Repártense en 25 centros que se distribúen polas tres comarcas.

A primeira vaga de coronavirus tivo pouca incidencia en Ferrolterra neste tipo de espazos. Aínda así, houbo brotes. Os máis graves, polo número de afectados, foron o do CAMF e o da residencia de maiores As Fragas, en Pontedeume, onde se rexistraron tres persoas falecidas. 
O novo cribado responde á estratexia de control e detección precoz deseñada desde o comité clínico de expertos sanitarios para esta fase da pandemia.

Respecto dos casos actuais de coronavirus, os datos na área sanitaria de Ferrol mantéñense estables, cos mesmos once activos, nos seus domicilios, e sen variacións no número de altas, que segue en 571. Fai 18 días que non hai persoas con Covid-19 ingresadas no hospital.

Comentarios