Miércoles 20.03.2019

Feira de exaltación do queixo en Moeche

O recinto do mercado acolle hoxe a cuarta edición dun evento no que se inclúen variadas propostas

Moeche acapara hoxe boa parte do protagonismo da axenda de lecer da comarca coa celebración da cuarta edición da Feira do Queixo que terá lugar no recinto do mercado.


Un total de 24 queixarías de Galicia, Asturias, Castela e León, Extremadura e mesmo de Francia achegarán durante todo o día os seus productos ao público, que poderá gozar dun amplo abano de actividades desde as 10.00 e ata as 19.30 horas. Xunto ás especialidades do devandito produto haberá tamén pan, mel e doces tradicionais. No tocante ás actividades, a rapazada será a destinataria dos dous obradoiros programados: un de cerámica –desde as 11.00 e desde as 16.30 horas– e outro de elaboración de queixos que dará comezo ás 12.45 da man das veciñas de Gandería Lavandeira. Os dous son gratuítos.

Catas
Na zona de catas –dirixidas polo experto Alejandro Montes– poderanse probar catro queixos diferentes acompañados de viño. A primeira comezará ás 13.15 horas e estableceuse un cupo máximo de 20 persoas por degustación, que terá un prezo de cinco euros por asistente.


Ás 12.30 horas terá lugar a recepción oficial á delegación procedente do concello asturiano de Onís, zona da que procede o queixo convidado deste ano, o Gamonéu. O programa contemplará así mesmo un concurso de pratos elaborados con queixo, no que serán premiadas as mellores receitas doces e salgadas.
Animación


Entre as propostas de animación inclúese, ás 17.00 horas, a actuación do pallaso Peter Punk, para ás 17.45 proceder á entrega dos premios do certame. A continuación será a quenda da música co grupo folk Encrucillada. O dúo Rosas encargarase, pola súa banda, de amenizar o evento ao mediodía.

Transporte
O Concello de Moeche facilitará o desprazamento á feira cun servizo especial de tren que partirá de Ferrol ás 10.45 ata chegar ao apeadeiro da vila, onde haberá agardando un autobús. O servizo fará tres viaxes de volta –ás 14.00, 17.25 e 19.15 horas–.


Tamén durante todo o día permanecerá aberto o castelo e porase un autobús para quen queira visitalo, con saída ás 12.00 e ás 13.00 horas do recinto feiral e volta ás 12.30 e 13.30 horas.

Comentarios