Concentración no campus de Ferrol en contra da creación da universidade privada de Galicia

Concentración no campus de Ferrol en contra da creación da universidade privada de Galicia
Un momento da concentración celebrada onte no campus de Ferrol

A Plataforma Galega en Defensa da Universidade Pública –impulsada por sindicatos e organizacións estudiantís e á que xa se adheriron outros grupos sociais e políticos– convocou onte concentracións en toda a comunidade para amosar o seu rexeitamento á creación da nova universidade privada promovida por Abanca.

En Ferrol, a acción de protesta desenvolveuse no campus de Esteiro, ante o edificio do Vicerreitorado local.

Sindicatos, estudantes e membros da comunidade universitaria secundaron unha mobilización na que puxeron de manifesto o seu absoluto rexeitamento a esta “privatización” e “mercantilización” da educación.

Pediron, neste sentido, a paralización do proxecto lexislativo que “vai permitir a creación da Universidade Intercontinental da Empresa sen apenas coñecerse cales van ser as intencións dos seus promotores en canto a oferta formativa”, salientan.

Informan ademais desde a Plataforma que, segundo a normativa existente, debería ofertar cando menos oito títulos entre graos e posgraos, “e parece que queren concentrar esta oferta nos eidos xurídico-social e enxeñaría-arquitectura”.

Lamentan así que “mentres se lle nega a autorización de novas titulacións ás universidades galegas e se ten conxelada a taxa de reposición dos seus efectivos, semella que se lle vai dar carta branca tanto para a contratación do profesorado como para a oferta académica, sen garantías de que se van cumprir os requisitos de calidade e excelencia”.

Reitores

Os reitores das tres universidades galegas, Julio Abalde (UDC), Antonio López (USC) e Manuel Reigosa (Vigo) emitiron onte un comunicado conxunto no que agradecen ás organizacións sindicais e as de representación estudantil que conforman a Plataforma pola Defensa da Universidade Pública o “seu compromiso e apoio” e pediron ademais á cidadanía e ás institucións públicas que “poñan na súa axenda as solicitudes de financiamento, lexislativas e de autonomía para que as universidades públicas do Sistema Universitario Galego sexan cada día un pouco máis fortes e poidan seguir mellorando e ocupando posicións de liderado ne escena nacional e internacional, convencidos de que isto redundarán nun mellor futuro para Galicia e para as galegas e galegos”, salientan.

Engaden ademais que, fronte á iniciativa privada, “pensamos que os esforzos dos cidadáns, a través dos seus impostos, deber ir encamiñados a fortalecer o actual sistema universitario público”, indican no escrito.

Concentración no campus de Ferrol en contra da creación da universidade privada de Galicia

Te puede interesar