Ruta teatralizada polo “Camiño das Letras” entre Caamouco e Limodre

Ruta teatralizada polo “Camiño das Letras” entre Caamouco e Limodre
A actividade desenvolveuse o domingo en catro quendas | CEDIDA

Máis dun cento de persoas secundaron o domingo na segunda edición de “Camiños das Letras”, a ruta teatralizada organizada pola Agrupación Instrutiva de Caamouco xunto coa Asociación de Veciños de Limodre para celebrar as Letras Galegas.


Divididos en catros grupos, e con saídas escalonadas, os participantes gozaron dun itinerario que tivo como principal reclamo o Pazo do Piñeiro, logo de varios meses de xestión por parte da Agrupación cos seus propietarios para a súa apertura.


Para a entidade constitúe, de feito, “un logro histórico, logo de moitos anos de traballo. É a primeira vez que a nosa entidade consegue desenvolver unha proposta cultural neste emblemático espazo”, destacan desde o colectivo. A camiñata, de oito kilómetros de percorrido, atravesou Caamouco e Limodre, chegando ata o muíño das mareas de Río Castro, en Cabanas.


Percorrido

O percorrido, circular, estivo ademais animado polos actores e actrices do grupo da Agrupación, Tenencia Teatro, dirixido por Eugenia Sanmartín, que sorprenderon ao público con escenas teatrais en diferentes puntos do camiño con valor patrimonial, paisaxístico ou simbólico, como a Horta de Quinín, o Porto de Redes, Almieiras, Río Castro e as sedes das dúas entidades organizadoras.


Tamén contou a proposta coa colaboración musical do grupo Airiños de Fene, do grupo de pandereteiras da Agrupación Instrutiva de Caamouco, a cantante Amparo Arias, o gaiteiro Manolo Doval, o zanfonista Emilio Mesias e Roger de Flor.


Así mesmo, a pintora Dolores González, mestra na Agrupación, inmortalizou esta xornada nun lenzo ao óleo que pintou durante as representacións no propio xardín do pazo. 

Ruta teatralizada polo “Camiño das Letras” entre Caamouco e Limodre

Te puede interesar