A alcaldesa de Narón, Marián Ferreiro, informou nas últimas horas que os orzamentos municipais do ano que ven, que se levarán ao pleno da vindeira semana, ascenden a 35.081.634 euros. O documento, indicou, presentouse o xoves aos integrantes da Comisión de Contratación, Persoal e Especial de Contas. “Son uns orzamentos sociais, nos que se mantén como outros anos a prioridade na atención ás persoas, cos impostos conxelados e a inexistencia de débeda bancaria, grazas á xestión realizada durante o mandato e que aporta unha situación de estabilidade financieira a esta cidade”, subliñou Ferreiro.

Ao capítulo de investimentos explicou que se reserva unha partida de 1,23 millóns de euros. “Os investimentos previstos no vindeiro exercicio acometeranse na súa práctica totalidade con cargo a fondos propios, a diferencia doutros anos nos que contamos con subvencións como as dos Fondos Europeos Edusi, que están executadas ou en proceso de execución”, apuntou. A alcaldesa asegurou que a data do pasado martes, día 20, “tiñamos once millóns de euros en execución, cun orzamento, o do pasado ano, que partiu duns tres millóns de euros e que estaba este mes en dezaseis millóns”. Ferreiro recalcou tamén que “o orzamento é un documento dinámico e nós partimos sempre dun documento realista, que se poida levar a cabo, que nos permita materializar esas propostas que plantexamos hai catro anos e que levamos desenvolvendo nese tempo para o proxecto de cidade que no seu día presentamos”.

A alcaldesa destacou o incremento nuns 400.000 euros para o Servizo de Axuda no Fogar. “Un incremento que require un servizo prioritario para atender ás nosas veciñas e veciños e no que con cargo ás arcas locais se asume un importante desembolso, ao financiar a Xunta a 13 euros a hora cando ten un custe de 21 euros o que non nos permitiría, no caso de non incrementar a nosa aportación, atender as necesidades actuais do servizo”. Ademáis, explicou, o gasto corrente increméntase por custes da enerxía eléctrica, e a inflación afecta a contratos que houbo que revisar por aumento dos custes de materiais, de persoal, etc.

En canto aos gastos, sinalou Ferreiro que hai un incremento considerable nos de persoal, ao aplicar as subidas que actualizan as retribucións do Estado e a reclasificación dos postos de parte do plantel do Speis, entre outros. Tamén se incrementou a partida destinada ao Padroado da Cultura e programáronse investimentos como melloras en eficiencia enerxética en centros de ensino e edificios municipais, reposicións asfálticas en vías do termo municipal, melloras en zonas verdes, en instalacións deportivas como o pavillón da Gándara, a pista de skate, ou no pavillón da Mocidade.

A rexedora defendeu que son uns “orzamentos estables feitos dende a máis absoluta responsabilidade, que constatan o modelo de xestión concebido a longo prazo, que non se centre no último ano de mandato”, dixo.