As inmediacións da praza do colexio de Xuvia, en Narón, acolleron este sábado un acto aberto á cidadanía organizado polo Bloque Nacionalista Galego (BNG) da comarca para conmemorar o Día da Patria. Na cita –baixo o lema este ano de “Galiza Sempre, unha nación en marcha pola súa soberanía”– tomaron parte a portavoz da formación na localidade, Olaia Ledo; a responsable comarcal, Pilar Lozano; e o deputado no Congreso, Néstor Rego. A nota musical ao evento púxoa a formación Vai Rañala Meu!.

A formación resaltou que esta celebración non se trata soamente dunha data simbólica no calendario, senón “da expresión da voltade do pobo galego de avanzar cara a un marco político no que Galiza poida exercer plenamente os seus dereitos”.

Rego fixo fincapé na súa intervención no apoio social cara ao BNG, do que aseverou que “representa o motor dun cambio necesario e profundo no noso país. Aspiramos a construír unha Galiza soberana e con futuro, aproveitando as nosas potencialidades e garantindo o benestar da cidadanía”, remarcou.

O deputado nacionalista quixo subliñar tamén “a traxectoria limpa da formación”, destacando no que respecta á súa presenza en Madrid, o feito de que “nunca facilitaremos un goberno da dereita ultra e da ultra dereita”. Desde o BNG animan á sociedade galega a participar na manifestación que percorrerá as rúas de Compostela o vindeiro 25 de xullo.