A Xunta recurre ao consenso do empresariado e o Concello para ubicar a glorieta da AC-566
Unha trintena de empresarios asentados no polígono empresarial das Lagoas, nas inmediacións da estrada de Cedeira (AC-566) presentaba en novembro do pasado ano na delegación provincial da Consellería de Política Territorial un escrito explicando á Xunta a necesidade de construír unha terceira glorieta no vial e de ubicala nas proximidades da firma Carburos Metálicos. O colectivo denuncia a “desinformación” sobre as obras de mellora de seguridade vial proxectadas pola administración autonómica na AC-566 e amosou a súa “total indignación” tralo anuncio da Xunta de ubicar a terceira rotonda xunto á gasolineira da estrada de Cedeira. Os afectados pola intervención recordan que o anterior goberno bipartito respaldaba a construción da terceira glorieta xunto a Carburos, “nunha zona exenta de edificacións”. Aquela decisión, segundo o colectivo, tomouse “imparcialmente, tralas numerosas alegacións presentadas que a demandaban e despois de estudar exhaustiva e obxectivamente as necesidades das empresas”.
Aberto o prazo para inscribirse no outlet que acollerá os días 6 e 7 o pavillón de Santa Icía
Os comerciantes de Ferrol e Narón interesados en participar no outlet que se celebrará os días 6 e 7 de marzo no pavillón polideportivo de Santa Icía dispoñen dunha semana de prazo para inscribirse. Así o anunciou onte a concelleira de Promoción Económica de Narón, Ángeles Díaz, que xunto co seu homólogo ferrolano, Ramón Veloso e coa presidenta da Asociación de Empresarias Aecofe, Ana Armada, presentou o acto.
O PSOE interésase polas necesidades da nova entidade veciñal Virxe da O de Pedroso
A portavoz municipal do PSOE de Narón, Catalina García, e outros membros da indicada agrupación recibiron na súa sede de Santa Icía aos integrantes da xunta directiva da Asociación de Veciños Virxe da O, de Pedroso. Na xuntanza, segundo indicou García, anotáronse as necesidades e prioridades que os representantes veciñais trasladaron aos políticos locais. Entre as mesmas están a dun local social cos servicios básicos, para poder desenvolver a súa actividade, a dotación de beirarrúas en diversos lugares da parroquia, a urbanización do espazo entre o apeadeiro de FEVE e a estrada AC-112, e servizo de auga potable, entre outras demandas.
A Xunta recurre ao consenso do empresariado e o Concello para ubicar a glorieta da AC-566
