Sábado 11 de Octubre de 2008
Portada - Opinión - Ferrol - Narón - Comarcas - Galicia - Deportes - España - Mundo - Economía - Sociedad - Comunicación - Última Página -
Os universitarios póñense en forma Imaxe de arquivo do curso de mergullador deportivo desenvolvido en cursos anteriores REPORTAXE DE R.P.P. EXERCICIO > O campus de Esteiro acollerá actividades do programa “Actívate” dentro da Semana do Deporte na Universidade “Mens sana in corpore sano”. O vello lema en latín segue hoxe máis vixente que nunca e para que as mentes dos profesionais do mañá se aloxen nun corpo saudable Xunta e campus galegos promoverán conxuntamente nos próximos días o programa “Actívate”, baixo o que se agocha a Semana do deporte na universidade. Os campus galegos acollerán entre o luns e o xoves diversas actividades que promoven o exercicio físico e co que tamén pretenden achegar os servizos deportivos universitarios e a súa ampla oferta. Ao de Ferrol tocaralle o mércores. O campus de Esteiro desenvolverá diversos exercicios entre as doce da mañá e as tres e de catro a sete da tarde, entre eles un test para avaliar a condición física de cada estudante na actualidade. Segundo explicou Yago Arango, coordinador do programa, as probas consistirán na medición de parámetros como a forza, a resistencia ou a flexibilidade, o índice de graxa corporal, entre outras cuestións. Os resultados serán analizados por un grupo de profesionais da actividade física e deportiva que os aconsellará sobre a mellor maneira de organizar a práctica deportiva tendo en conta as preferencias e necesidades de cada un. As cifras obtidas de cada participante compararanse co promedio estatístico que debería presentar unha persoa nun estado saudable e prescribiranse as actividades adecuadas para reforzar aquelas áreas nas que o participante fraquee máis. Ademais, tódolos participantes nesta primeira posta a punto participarán no sorteo dun iPod Touch de Apple. A organización de “Actívate” anima a tódolos estudantes a sumarse á iniciativa, e asegura que a práctica habitual de actividade físico-deportiva moderada mellora a saúde e a calidade de vida. A Xunta de Galicia, a través da Dirección Xeral para o Deporte, a Fundación Deporte Galego, e as universidades da Coruña (UDC), Santiago de Compostela e Vigo promoven o programa que se desenvolverá entre o luns e o xoves da próxima semana. Portada | Opinión | Ferrol | Narón | Comarcas | Galicia | Deportes | España | Mundo | Economía | Sociedad | Comunicación | Última Página | El tiempo | Titulares | Servicios | Agenda | Exposiciones | Cartelera | Correo |