Opinión Miércoles 14 de Mayo de 2008

LETRAS GALEGAS

CABO PRIOR XAIME BELLO COSTA (*) No coloquio que tivo lugar despois dunha conferencia do profesor Francisco Rodríguez sobre a situación actual do noso idioma, houbo dúas intervencións que quero salientar. Unha, dunha señora, que sobrepasaba os setenta anos, que se lembraba de como sendo nena, se cadra xa moza, se rían dela por falar en galego en ámbitos que menospreciaban aos que empregaban a lingua propia do país (con todo, ela dixo que lle daban pena quen o facían). A outra intervención, dunha profesora, censuraba que aínda hoxe nos libros de texto non se recolle ningunha referencia a etapas trascendentais da nosa nación (como tal a época na que Galiza estivo constituída como reino), sen que as autoridades educativas que supervisan e autorizan a utilización destes libros nas etapas de ensino obrigatorio, fagan nada por evitar esta descarada e interesada ocultación de períodos claves para sabermos de onde vimos e o papel que xogamos na historia peninsular. Velaí a importancia que ten a manifestación convocada para o domingo, día 18, en Compostela, pola Mesa pola Normalización Lingüística, polo dereito a vivirmos en galego. Nuns tempos (de ficción e de autoodio) nos que se di, sen rubor, que o español está en perigo en Galiza e que se quere impoñer o galego (o mundo ao revés), non podemos mostrarnos nin indiferentes nin pasivos. Precísase un compromiso persoal coa nosa lingua. O futuro do galego depende de nós. (*) XAIME BELLO COSTA FOI ALCALDE DE FERROL

Portada | Opinión | Ferrol | Narón | Comarcas | Galicia | Deportes | España | Mundo | Economía | Sociedad | Comunicación | Última Página | El tiempo | Titulares | Servicios | Agenda | Exposiciones | Cartelera | Correo |