Ferrol Martes 9 de Febrero de 2010

A ferrolá Mabel Rivera métese na pel de María Callas na peza “Master Class” Xosé Rabón, María Torres, Mabel Rivera, Irisarri, Carbajales e Lino Braxe durante a rolda de prensa luis polo REDACCIÓN> FERROL A actriz ferrolá Mabel Rivera achegouse onte ata Ferrol para presentar “Master Class”, un espectáculo a medio camiño entre a ópera e o teatro e no que a actriz se meterá na pel da carismática cantante de ópera, María Callas. A montaxe estrearase o vindeiro 15 de abril no Jofre. Neste escenario permanecerá dúas xornadas máis antes de iniciar unha completa xira por teatros do resto de Galicia e España. O punto de partida de “Master Class” son as clases que a soprano impartiu durante os últimos anos da súa vida na afamada academia neiorquina Juilliard. O autor do texto, Terrence McNally, soubo unir de xeito maxistral a vida privada e artística da Callas creando un conflito de matices no que público, actores e cantantes vense implicados. Mabel Rivera é a impulsora do proxecto que agora saca a escena Bengala Produccións. “Nunca me sentín tan implicada desde a orixe cunha función”, comentaba onte. Neste senso explicou, coñecía o texto desde hai dez anos pero que non foi ata o ano 2007 (a raíz de introducirse no mundo da música colaborando coa Orquestra Sinfónica de Galicia na obra “O rescate de Penélope”) cando se planteou sacala adiante. “Púxenme a traballar na tradución e empecei a movela, levou tempo pero aquí estamos”. “Foi un proceso rarísimo porque foi á inversa”, sinalou referíndose a que normalmente os actores teñen que esperar a que alguén lles propoña un proxecto e neste caso foi ó reves. En relación ós aspectos máis artísticos da peza sinalou que “a función é unha lección maxistral, o público vai estar presenciando o destripe o traballo real dun artista”. “Amosa a loita co creador e da persoa, da necesidade que ten o artista de apropiarse dos seus materiais de traballo antes de saír a escena”. Trátase, segundo explicou, “dun exercicio de complicidade co público”. Nesta mesma liña manifestouse tamén o director do espectáculo, Xosé M. Rabón, presente xunto cos actores Lino Braxe e María Torres no acto. “Master Class’ fala da vida e da arte, de como é a loita interna dos artistas que normalmente non coñece o público. Aquí amósase o conflito entre a artista e a persoa, esto vexe reflexado nos alumnos ós que lle da clase” sinalou. Sobre Mabel Rivera, Rabón comentou que foi a impulsora do proxecto e que “é a María Callas perfecta”. Os dous coincidiron á hora de asegurar que desde un principio pensaron en Ferrol, e concretamente no Jofre, para estrear este espectáculo. Pola súa banda, o alcalde, Vicente Irisarri, calificou de “regalazo para a cidade” o espectáculo. A concelleira de Cultura, Mercedes Carbajales, mostrouse tamén satisfeita de poder contar cunha montaxe desta calidade dentro da programación do Jofre. O elenco artístico de “Master Class” complétase con actores da talla de Lino Braxe e María Torres. Dos papeis líricos encárganse Julia Cea e Enrique Martínez. Tamén participa Celso Parada. Portada | Opinión | Ferrol | Narón | Comarcas | Galicia | Deportes | España | Mundo | Economía | Sociedad | Última Página | El tiempo | Titulares | Servicios | Agenda | Exposiciones | Cartelera | Correo |