Ferrol Miércoles 9 de Julio de 2008

Os perruqueiros con máis imaxinación múdanlle o aspecto ós cidadáns Imaxe das actuacións que se celebraron onte en diversos lugares da cidade DANIEL ALEXANDRE REDACCIÓN > FERROL Un psicólogo, un experto en literatura inglesa e unha licenciada en Belas Artes xúntanse no espectáculo “Senta a cabeza” par crear unha orixinal proposta na que conviven a música, a escultura e a perruquería. Será un dos principais atractivos do programa de hoxe de “Caixanova na rúa”. No segundo día do “Caixanova na rúa” proseguirán os obradoiros científicos e de hip hop ó tempo que emerxen novas propostas para encher de vida o centro da cidade. A máis orixinal será, con seguridade, o espectáculo de perruquería que durante tres horas -entre as 17.30 e as 20.30- se desenvolverá na praza das Angustias. Os propios espectadores poden deixarse nas mans de Fafá Franco, Mercurio e Cécile Ribas para mudar a xúa imaxe cun aspecto rompedor. Ó longo do día serán varias as actividades ás que se poderán sumar, de xeito libre e gratuíto, os transeúntes. No Cantón, ás 12.30 e ás 19.30, Javi Javichi abrairá ós espectadores co seu espectáculo de clown e malabrares. “Veló como o raio” é o título desta proposta chea de humor e o seu artífice, un artista recoñecido polo público co premio do Festiclown Compostela 2005. A explosión na rúa chegará ás 20.30 horas, nas Angustias, con Hortzmuga, que presenta o espectáuclo “12 K”. Este grupo de teatro achega unha obra dinámica, pensada para favorecer a participación da xente e orientada a tódalas idades. Esteiro vivirá un entroido en pleno verán. O Capitán Maravilla volve á cidade, a Amboage, ás 21.30 horas. Este superheroe mistura malabares, voos, danzas e humor nun circo particular que foi presentado e premiado en Xapón e que tamén tivo o recoñecemento do público na Feira do Teatro de Tárrega. As Angustias será de novo o lugar central da programación xa pola noite, co concerto que ofrecerán ás 22.30 horas o Cuarteto de Guitarras de Lisboa. Trátase dun proxecto recente, que naceu en 2006, e que desde entón actúa con grande éxito por todo Portugal, cun percorrido que vai desde os clásicos (Bach, Tchaikovsky) á música sudamericana e ás propostas lusas máis contemporáneas. Outra opción, a partir das once, é acudir ó Cantón á proxección de curtametraxes dos mellores realizadores galegos. O programa quíntuple inclúe “Sálvame”, de Javier Veiga; “Copy Shop”, de virgil Widrich; “Perversa Lola”, de Sonia Méndez; “Un hombre tranquilo”, de Aránzau G. Bayón; e “Non retornable”, de Marcos Méndez e Eva Rey. Inauguración > A programación cultural na rúa proseguirá ata o venres. Comezaba onte coa apertura, na praza de Armas, dunha pequena carpa dedicada á ciencia e que permanecerá aberta de 11.00 a 14.00 e de 17.00 a 19.30 horas. Alí os nenos aprenderon a cociñar co sol ou a derritir o xeo á maior velocidade. Outra proposta de grande interese comezou no Cantón. Trátase dun obradorio de hip hop no que se pode participar de 12.00 a 14.00 e de 19.00 a 21.00 horas. Os espectáculos de pantomima de Jordi Carlitos e Marcelopuntomime, a proxección de curtametraxes do Cantón e o concerto de jazz de Mr. Dixie Jazz Band marcaron a xornada inaugural dunha iniciativa que chega a Ferrol por segundo ano consecutivo. Portada | Opinión | Ferrol | Narón | Comarcas | Galicia | Deportes | España | Mundo | Economía | Sociedad | Comunicación | Última Página | El tiempo | Titulares | Servicios | Agenda | Exposiciones | Cartelera | Correo |