Ferrol Martes 16 de Marzo de 2010

Case 150 parados solicitaron tres cursos do programa de emprego do Concello REDACCIÓN > FERROL Un total de 139 persoas desempregadas inscribíronse para realizar tres cursos de inserción laboral organizados polo Concello, dentro do programa Ferrol, Punto de Emprego. Trátase dos itinerarios formativos en Xestor de Casos de persoas en situación de dependencia, Limpeza de inmobles e Xerocultor especializado en actividades de ocio e tempo libre, que ofrecen en conxunto 45 prazas, 15 para cada un deles. Segundo informaron onte dende o goberno local, os técnicos municipais iniciaron xa o proceso de selección dos beneficiarios dos cursos. Entre os tres previstos, o que espertou máis interese foi o de Limpeza de inmobles, con 57 solicitantes, seguido do de Xerocultor, con 47, e finalmente polo de Xestor de casos de persoas en situación de dependencia, con 35 demandantes. O concelleiro de Promoción Económica e Emprego, Ramón Veloso, valorou o interese amosado polos cidadáns para participar neste proxecto. Como se lembrará, trátase dunha iniciativa cofinanciada polo Fondo Social Europeo con máis de 800.000 euros e destinada a facilitar a integración no mercado laboral dos colectivos con máis dificultades de inserción, coma os menores de 30 anos, as mulleres, o maiores de 45 ou os parados de longa duración. Selección > Polo que respecta ó procedemento de selección, o edil explicou que se desenvolverá en tres fases. Primeiro realizarase unha preselección das candidaturas presentadas que cumpran os requisitos das bases en cada itinerario. Despois farase unha entrevista persoal e finalmente elaborarase a listaxe de admitidos e de reservas, tendo en conta a puntuación obtida na segunda fase. Portada | Opinión | Ferrol | Narón | Comarcas | Galicia | Deportes | España | Mundo | Economía | Sociedad | Última Página | El tiempo | Titulares | Servicios | Agenda | Exposiciones | Cartelera | Correo |