Comunicación Domingo 30 de Noviembre de 2008

Galicia e Brasil renovan a súa colaboración para o cinema REDACCIÓN > A CORUÑA O Consorcio Audiovisual de Galicia e a Axencia Nacional do Cinema de Brasil renovan e amplían o seu convenio de colaboración. A próxima convocatoria introduce o formato documental entre as producións que poden optar ao fondo de coprodución. No marco do Encontro hispano-brasileiro de Cinematografía que vén de celebrarse en Brasil e Madrid, os representantes da Axencia Nacional do Cinema de Brasil (Ancine) e do Consorcio Audiovisual de Galicia mantiveron diversas reunións nas que acordaron introducir unha serie de modificacións na convocatoria do Fondo de Coprodución do 2009. A inclusión expresa dun proxecto documental, dotado dun orzamento propio, surxe despois de analizar o elevado número de inscricións correspondentes a este xénero que se deron nesta edición. Así, se manterá o apoio ás dúas longametraxes de ficción ou animación, unha maioritaria brasileira e outra galega, coas que xa se contaba nas anteriores bases do 2008. A publicación da convocatoria de 2009 no mes de marzo, durante o terceiro Encontro Audiovisual Galicia-Brasil que moi probablemente terá lugar na segunda quincena do mes en Salvador de Bahía. Estas decisións tomáronse en base á alta calidade dos nove proxectos presentados, o que animou á Comisión Técnica a suxerir ao Consorcio e Ancine a continuar con esta iniciativa de cara a vindeiras edicións, introducindo as citadas melloras. Esta innovadora ferramenta de financiamento naceu mediante a sinatura o 21 de setembro de 2007 dun protocolo de colaboración, polo que se comprometían a Agencia Nacional do Cinema e o Consorcio Audiovisual de Galicia a crear un Fondo de Coprodución de proxectos audiovisuais galego-brasileiros. Este é o único acordo de coprodución con dotación económica existente entre Brasil e España. Os primeiros froitos desta iniciativa son dúas coproducións que se atopan en fase de pre-produción: “O Sexo dos Anxos”, de Continental Producciones S.L. e de Ccfbr Produçoes Audiovisuais LTDA., como produción maioritaria galega, e “Entre a Dor e a Nada”, das produtoras MPC & Asociados, Ficción Producciones, S.L. e Filmes do Tejo, como produción maioritaria brasileira e que verán a luz a finais do próximo ano. O Encontro Audiovisual Galicia-Brasil contará con tres liñas fundamentais de actuación: un Fondo de Coprodución, un Encontro entre produtores de ambos os territorios e unha Mostra de Cine Galego. No segundo Encontro celebrado na Coruña o pasado mes de xuño unha delegación de autoridades e profesionais do Brasil desprazouse ata Galicia con nove produtoras. Portada | Opinión | Ferrol | Narón | Comarcas | Galicia | Deportes | España | Mundo |Economía | Sociedad | Comunicación | Última Página | El tiempo | Titulares | Servicios | Agenda | Exposiciones | Cartelera | Correo |