Non hai morte sen esquecemento, deben pensar con tino no Barqueiro e así a localidade de Mañón quere lembrar a quen foi o seu artista máis ilustre falecido agora hai dous anos. Secundino Rivera (1932-2013) recibe unha homenaxe dos seus paisanos o próximo sábado 29, ás 20.00 horas na praza do Mesón do Barqueiro. Alí o concello mañonés convoca aos veciños e amantes da arte “para participar na homenaxe a Secundino Rivera, o mairande artista nacido no Barqueiro que levou o nome da súa terra polo mundo adiante”. Unha rúa levará o seu nome e, posteriormente, inaugurarase unha mostra antolóxica da súa obra. Hai que dicir que será a segunda rúa co seu nome, a primeira está na localidade madrileña de Olmeda de las Fuentes, moi vinculada a súa traxectoria vital.
biografía
Fillo dun albanel fusilado en Ferrol tras o alzamento franquista, este feito marcou a súa vida e crenzas. A súa nai e a súa tía coidaron del e na súa infancia descobre a súa fascinación polo debuxo e a pintura. En 1955 emigra a Venezuela e en Caracas comeza gañándose a vida en restaurantes, recupera a súa afección infantil con traballos de pintura e deseño de carteis. En 1960 ingresa na Escola El Bosque, fundada e dirixida polos pintores españois Francisco San José e Pilar Aranda. Alí realiza a súa formación tardía pero comeza a expoñer habitualmente. A mediados dos anos 60 regresa a Europa iniciando unha itinerancia artística e xeográfica cos seus vértices en Venezuela, Madrid e O Barqueiro, marcha a París e no Louvre copia a grandes creadores do Renacemento e Barroco.
Tecnicamente realiza óleos, acuarelas, gravados en temáticas nas que destaca a paisaxe e a luz venezolana, con abundantes mariñas e retratos. Da pintura ábrese con éxito á escultura e así, a comezos dos anos 90 pon en marcha un taller de fundición en bronce, en Val Fresco, considerado o máis importante do país. A súa vinculación con O Barqueio foi constante e nos seus últimos anos rehabilitou un vello muíño de vento en O Barqueiro, do que fixo a súa residencia ocasional e estudo.
obradoiro infantil
O Concello de Mañón organiza mañá, de 12.00 a 13.00 horas, un obradoiro lúdico para nenos de 3 a 12 anos en recordo de Rivera no seu segundo cabodano. Será no pavillón de Esteiro (O Barqueiro) e as inscricións, que se poden realizar nas oficinas do concello, son de balde.