Tres rapazas lograron os primeiros premios nas tres categorías do VI Concurso de Piano da Sociedad Artística Ferrolana que onte rematou a súa segunda e última xornada no auditorio de Afundación. Así, a santiaguesa Sara Pinaque García, de 14 anos, logrou a categoría “Autonómica” e os 900 premios do galardón. O segundo posto, e 400 euros, foi para Cristina Bernal Gómez, de Culleredo; e Iván Ruibal Seoane de Vilaboa (Pontevedra) foi terceiro e acadou 200 euros.
Na segunda categoría, a gañadora foi Noreia Hermida Pérez (12 anos), de San Sadurniño; a quen seguiron “ex aequo” as ferrolás Ana María de García de Paredes Dupuy e David Seoane Castilla, mentres Martín Otero Ferreira, tamén de Ferrol, foi terceiro. Finalmente, a terceira categoría foi para Sara López Expósito (11 anos) de Ferrol, seguida da cedeiresa Beatriz Leonardo Labraña e da ferrolá María del Carmen de García de Paredes Dupuy. Houbo unha mención de honra para Claudia Zhu Díaz Casas de Narón.
O presidente do xurado foi Miguel Brotóns (que estivo acompañado dos profesores Ricardo Blanco, Rosa María García, Jorge Briones e Daniel Zacarés) quen salientou tanto o nivel “altísimo” dos participantes como a asistencia masiva do público que en cada xornada encheu a sala do auditorio de Afundación.
Para Brotóns, as interpretacións dos novos pianistas foron dunha “altura enorme” e cualificou a competición de “excepcional”, con premios por unanimidade ao tempo que agradeceu a xenerosidade do resto do xurado e a estreita implicación de Afundación. Trala entrega dos premios, Sara Pinaque García, gañadora da categoría “Autonómica” interpretou o himno da SAF.