11º-22º
sábado | 20 abril | 2024
O sábado 27 de abril o xeógrafo Juan López Bedoya dirixirá unha ruta sonora pola costa de Ferrol. O venres 3 de maio, en Espasante, haberá tamén un roteiro e un concerto con cantos mariñeiros. Son as dúas propostas vencelladas a Ferrolterra que se realizan dentro do programa European Acoustic Heritage (Patrimonio Acústico Europeo), que se desenvolve en varios países desde 2011 e que agora se pon en común en Galicia. Nunha primeira fase traballouse en Austria, Francia, Finlandia e Galicia rexistrando sons naturais, de oficios tradicionais, mecánicos, industriais, sinais acústicos, de interacción social, silencios e eventos sonoros, entre outros. Agora éntrase na fase de xuntar todos estes coñecementos para compartir os resultados.
O que se pretende é subliñar a relevancia da paisaxe sonora como patrimonio inmaterial, afondando na súa contribución á diversidade cultural europea, segundo informan desde a Consellería de Cultura. Pola parte galega contribúen a Axencia Galega das Industrias Culturais (quen ideou o proxecto), así como a Fundación Illa de San Simón e o colectivo multidisciplinar Escoitar.org. Tamén colaboran a Universidade de Ciencias Aplicadas de Tampere (Finlandia), o Centro de Investigación sobre o Espazo Sonoro e o Medio Urbano de Grenoble (Francia) e o Phonogrammarchiv da Academia de Ciencias de Austria.
Ata o 3 de maio, e desde o pasado 9 de abril, desenvólvense en Galicia conferencias, talleres, paseos sonoros, actividades pedagóxicas, exposicións e concertos nos que se pon en común este traballo.
inscripción
O paseo sonoro pola costa de Ferrol do 27 de abril sairá ás 10.30 horas do teatro Jofre e fará un percorrido de dúas horas pola mañá e de dúas pola tarde para aproveitar as diferentes mareas. Haberá unha pausa para xantar. Hai un número de prazas limitado (vinte), polo que é preciso facer a inscrición a través do correo electrónico info@sinsalaudio.org ou no teléfono 619 637 211. Recoméndase levar auga e roupa de abrigo. Ademais, informan os organizadores de que esta viaxe poderá aprazarse se as condicións meteorolóxicas non son favorables.
Juan López Bedoya é profesor do departamento de Xeografía da Universidade de Santiago. Está especializado en xeografía física e investiga os eidos da xeomorfoloxía e a bioxeografía, participando en proxectos relacionados co paleoclima e a dinámica costeria en Galicia e Arxentina.
