11º-18º
sábado | 20 abril | 2024
Representante da descoñecida pero variada nómina de narradores africanos asentados en Galicia, como o camerunés Víctor Omgbá ou o guineano Francisco Zamora, o angolano Feliciano Alfredo dos Santos (Luanda, 1968), está comezando con pé firme unha carreira no mundo das letras.
Se esta traxectoria principiou coa novela en portugués “De donde é o senhor” –que en breve terá edición en castelán–, agora vén de aparecer nas librerías a segunda, o relato para todas as idades “Ñumen” (Editorial VL), un conto que trata sobre a vida dun pequeno ñu algo rebelde que non acepta o destino que a natureza lle ten reservado. Asegura Feliciano: “Sempre me fascinou o mundo dos animais, tanto na casa como na sabana. E de aí me inspirei para esta historia que fala de valores como a xustiza ou de como á xente se lle encasilla nun lugar no que non sempre está cómoda. E ante iso hai que ter o valor de enfrontarse á vida que a un lle marcan se non é a que sente”.
Considera o autor angolano que non estamos ante unha obra infantil. “Eu máis ben diría que é unha historia de aventuras para todas as idades. Ten humor, porque sempre é necesario, e tamén unha advertencia: coidado co que desexas porque ás veces o cumples”, e recoñece que ten algo de autobiográfico.
cambio de rumbo
Neste sentido Feliciano Alfredo dos Santos lembra unha vida que daría para outra novela e que racha cos tópicos. “Desde sempre fun moi precoz e aos 17 anos xa formaba parte como funcionario do ministerio de Exteriores de Angola, e viaxei en misións diplomáticas. Fun estudar á Unión Soviética e regresei empapado de marxismo. Eu era un marxista convencido ata que vin no meu país a hipocresía das clases dirixentes, mergulladas nese materialismo que tanto criticaban”.
Asentado en Arteixo coa súa familia, e soldador de profesión na actualidade, Feliciano quere continuar no mundo da literatura e de feito vai comezar a mover “Ñumen”, que ten ilustracións do seu fillo, non só como relato literario senón como un espectáculo teatral e oral para os pequenos. Unha historia que tamén traducirá pero, neste caso, ao portugués.
