Cabanas celebra con novas actividades outra xornada da romaría de Santa Marta

A zona da praia da Madalena co seu piñeiral continúa a ser o centro das actividades da romaría de Santa Marta que organiza o concello de Cabanas. Onte principiaron as iniciativas coa posta en marcha dun mercado, do concurso de castelos de area para pequenos e dun concerto de Cómplices e Limones na carpa situada no antigo campo de fútbol.
Hoxe o programa festivo comeza ás 10.00 horas coa apertura do mercadiño ao longo do paseo da Madalena. Ás 10.00 horas comeza a edición XXVI do cross popular. Ás 12.00 horas chegará unha caravana de vehículos clásicos e ás 12.30 levarase a cabo un pasarrúas con Airiños do Frade San Martiño do Porto, formación que actuará novamente a partir de las 17.30 horas tras o xantar popular que comezará ás 14.30.
Os pequenos volverán ser os protagonistas ás 18.30 horas coa actuación da compañía A Xanela do Maxín que representará a obra de monicreques “O murmurio do mar”. Posteriormente, ás 19.30 horas,  actuará a rondalla Estrelecer, a formación do CMI Unidade de Fene. Para rematar as actividades da romaría de Santa Marta o parque do Areal acolle ás 20.00 horas a final do IX campionato de baloncesto 3x3.