Afundación mostra as paisaxes da Terra Cha de Daniel Díaz Trigo

Desde onte pode verse na sede de Afundación en Ferrol a exposición fotográfica “Posesións para un esquecemento”, obra do artista Daniel Díaz Trigo, que recolle 29 imaxes galardoadas co I Premio Galicia de Fotografía Contemporánea que convocan desde 2013 a Asociación Proxecto Benito Losada e o Festival Outono Fotográfico, co patrocinio da Deputación de Lugo e a Xunta de Galicia e a colaboración de Afundación. A mostra poderá visitarse ata o vindeiro 17 de xaneiro de luns a sábados (a excepción de festivos), en horario de 11.00 a 14.00 horas e de 18.00 a 21.00 horas.
Díaz Trigo traballou no proxecto “Posesións para un esquecemento” durante sete anos. Nel conviven as raíces da fotografía documental que deu orixe ao xénero e á plasticidade que se incorporou posteriormente cando a fotografía pasou a formar parte das grandes artes, con grandes panorámicas de fotomontaxes e imaxes nas que se mesturan tamén o debuxo e a pintura. A exposición está estruturada en catro partes nas que se mostran espazos relevantes da Terra Chá: o campo, a colonización, as torres de Arneiro e o manicomio. A través das instantáneas, o autor reflicte a historia recente dos veciños da comarca luguesa, da súa biografía propia e familiar pero no contexto dos acontecementos que viviu Europa no século XX. “A exposición está chea de voces que non se oen, de silencios que xa non se lembran”, describe o propio Daniel Díaz Trigo.